مرحبا

ضُحى العبيدلي

في البداية للتوضيح ما كان فيني إلتواء أو إصابة من أيّ نوع، شخصية رياضية ما بين مشي وجري وفجأة حسيت بآلام في القدم اليمين ومع الأيام انتفاخات لدرجة ان تكرمون الجوتي ما كان يدخل برجلي الا بجهد والم زيادة، بديت أراجع عيادة العظام بمستشفى الرازي مع عمل اللازم من الأشعة والفحوصات،

كان التشخيص مبدئياً بوجود ورم في كاحل القدم اليمين مو خبيث قالولي مع العلاج يختفي وتختفي الآلام وتنتهي القصة

 (س) من الدكاترة اللي راجعت عندهم في البداية وصفولي أدوية وقالولي بعد جم شهر تردين تراجعين ونشوف وضعج ، مع الأيام ما نفعتني الأدوية وقرروا أني أسوي عملية لإزالته وعمل تنظيفات فقررت بعد التوكل على الله اسوي العملية بدون لا آخذ آراء دكاترة ثانين، 

ما كانت العملية الاولى سهلة أبداً، وما أدري الى الآن شنو الاجراء اللي تم داخل غرفة العمليات، طلعت بانتفاخات اسوء بوايد وآلام واكتشفت بإجراءات اضافية داخل العملية غير ازالة الورم

سخر لي الله شخصاً يحط لي موعد عند دكتور ما اعرف عنه غير (ما شاء الله عيادته كله زحمة، أحسن دكتور بالعظام الدكتور مشعل، يعطي المريض حقه

وأشوف الحالات اللي تدخل عليه أصعب بمراحل من حالتي ويطلعون مرتاحين

ارتحت وتطمنت ودخلت عليه، من الوهلة الأولى استقبلني بابتسامة وروحه المرحة، أعطاني من وقته الكثير عشان يسمع بالتفصيل حالتي ويسال عن تفاصيل التفاصيل وشنو العملية وليش سويتيها وما كان لها داعي كنتي تقدرين تتخلصين من مشكلتج بحلول ثانية، حسيت اني شخصية مهمة، فاهم وعارف ، خبرة ومهارة ماشاءالله، تدخل عليه تلقى مليون دكتور يتدربون تحته ويسالهم عن حالتي ها شرايكم ويجاوبون ويكلمني، يشرح بالتفصيل الممل الحالة والأسباب وإجراءات وطرق العلاج بين أ ، و ب و ج ، بدأت رحلة علاجي معه تدريجياً، مع الأدوية وحولني إلى أفضل دكتورة حسب كلامه للعلاج الطبيعي في مستشفى الرازي اسمها د.نجلاء السري وعلى طول دق عليها قالها بحولج حالة تابعيها وابدي معاها، رحت ودخلت أقابل دكتورة بشوشة 

أيضاً عطتني كل الوقت عشان تعرف الحالة وجنها اول مره تسمعها على الرغم من ان الدكتور مشعل مبلغها، اسالتني وين وصلت ريلي بالعلاج مع الدكتورة اللي قبلها وشرحت بالتفصيل شنو راح تسويلي وشنو التمارين سواء عندها بالعيادة ولا بالبيت،   

بعد العملية الاولى كانت حركة المفصل صعبة جداً وأحس ريلي متيبسة والمفصل مايتحرك وأعرج بالمشي بالاضافة الى الآلام 

طمنتني وشرحتلي كل شي بالتفصيل ليش احس بالتيبس وبعد العلاج شنو المفروض ريلي تكون نسبة انها ترجع مثل قبل وباشرت معاها خطوة بخطوة، الدكتور مع المراجعات قرر ان يعيد العملية ويشيل التليفات اللي صارت من العملية الاولى وتوقف علاجي الطبيعي عشان كرونا  

وراجعت للمرة الثانية الدكتورة نجلاء عطتني تمارين مكثفة مع شرح وتعديل وضعية كل تمرين

راقبت حركتي وشلون كنت اسوي التمرين وتعدل علي الحركة والمشي

استخدمت الأدوات بالعلاج من الباندات لتسهيل الاسترجنق واستخدمت ابر بالقدم لفك تشنج العضلات حتى وصلنا لآخر جلسات العلاج الطبيعي 

واللي شفت فيهم تغير ملحوظاً حتى يومنا هذا بفضلها وبفضل التمارين والنصائح

(كنت وين وصرت وين )

الرعاية اللي تلقيتها كانت أكثر من ما أتخيل

كانت ممتازة

بالنهاية هذي تجربتي وهذي حالتي اللي ممكن تكون غير عن اي احد بس من باب الافادة والنصيحة

لا تستهين بأي ألم في جسمك والأهم تراجع عند دكتور شاطر وفاهم وذكي، الراحة النفسية اللي بتحصلها بدخلتك عليه هذي اول العلاج والدكتور مشعل الهدهود ما يختلف عليه اثنين بأخلاقه وعلمه وفهمه وروحه 

ماقصر معاي فهمني وعطاني معلومات عن حالتي ماكنت أعرفها

لا تسلم عظامك حق شخص يبي يخلص من المريض وبس 

ثق بالدكتور اللي يعطيك من وقته وخبرته

وما أنسى فضل الدكتورة نجلاء الرقيقة 

فعلاً دكتورة وفعلاً يوم قال عنها أحسن دكتورة 

العلاج الطبيعي يبيله طوله بال والدكتورة بالها طويل وتصبر مع صبر المريض 

كلها ايجابية وروح حلوة

تعطي بعلمها وتحطها باالحالات شوف عيني 

باختصار كل مشكلة لها حل 

وكل حالة لها دكتورها

وبحالتي بعد الله مالقيت الحل الا عندهم

الله يبارك في جهدهم وعلمهم وصحتهم 

أنا اليوم وايد أحسن بفضل الدكتور مشعل الهدهود والدكتورة نجلاء السري 

مُمتنة لهم ولتجربتي معاهم